15% هيخلعوا من مصر

15% هيخلعوا من مصر





بحاول انى مكتبشى ..... كنت بحاول انى ابعد عن وجع الدماغ ... ولكن الحواديت اللى حوالينا تخللى الواحد مش قادر يسكت ... لازم تخليك تتكلم .
المهم خلينا فى المهم ... قالوا ثورة قلنا ماشى ...قالوا يمشى قلنا مش مشكله ....قالوا يتحاكم اهو مستنين ....قالوا هرب.....ياساتر .....قالوا مهربشى ....الحمدلله ....قالوا مات ....ربنا يرحمه .....قالوا مامتشى ....الاعمار بيد الله...
لكن هو ده االى هيعدل حالنا ؟ يعنى محاكمة مبارك او اعدامه هو ده اللى هيعدل حالنا ....طبعا لا ....والف لا .....
احنا ليه مش باصين غير للناحية بتاعة الرئيس واللى حواليه ..... ياريت تبصوا للناحية التانية ....ياريت تبصوا هل مصر هتبقى دولة يمقراطية ؟ هل الرئيس اللى جاى هيكون هو اللى احنا حاربنا علشانه ؟ هل مصر هتبقى دوله جاذبه ومش دوله نافره ؟
السؤال المهم للاخوة الثوار .... هل السلفيين بنفع معاهم الديمقراطية ؟؟؟ طبعا ماينغعشى وهما مش عاوزينها ...وشبهوها باللحمة الخنزير يعنى الديمقراطية زى الخنزير حراااام .
طبعاً هيجى واحد من شباب الثورة اللى زى الفل ويقوللك ويقسم لك انهم لن يحكموا ولن يتحكموا فينا........
فلازم نساله السؤال التانى .... ايه مدى قوة السلفيين فى الشارع المصرى ؟ وعلشان السؤال يبقى صح لازم نقول ايه مدى قوة السلفيين فى الشارع المصرى الجاهل ؟
ايه مش عارف ترد .... ولا مش عاوز ترد ...ولا خايف ترد ....
الموضوع بمنتهى البساطة من غير فزلكة ان احنا كنا فى جره وطلعنا لبره بمعنى الخطوة اللى احنا خطناها حلوة جداااا وكنا فاكرين ان الناس فاهمة احنا بنعمل ايه وعاوزين ايه ؟؟؟؟
بمعنى ان اكتر من 85 % من الشعب المصرى ....لو لقى واحد اشول بيكتب او ياكل بإيده الشمال ....هيقوله انت هتدخل النار .....
بمعنى ان اكتر من 85% من الشعب المصرى ... معتقد ان الشيطان فى الحمًام!
بمعنى ان اكتر من 85% من الشعب المصرى .... مؤمن بأن العلمانيين كفره ....وكان العلمانية ديانة !!!!!
بمعنى ان 85 % من الشعب المصرى ....مؤمن ان كل واحد مربى دقنه ...راجل متعلم وصالح ...واى حد يعرضه يبقى فاسد ...وعاوز ضرب ...ال...
ازاى تحاول تقنع الناس دول بالديمقراطية ..... ؟
وللعلم لو تم اجراء انتخابات مجاس الشعب قبل الدستور معنى كده ان احنا رايحين فى داهية بنسبة 190% .... ولا رايحين ايران ولا تركيا ....ولا حتى السعودية احنا رايحين كابول ...ايوة افغانستان ..
ولو اتعاملنا بنفس المنطق بتاع الاستفتاء ....ونظام غزوة الصناديق ....وشغل الدروشه ....يبقى لازم ال15 % يستعدوا للرحيل ....ولو ممشيوش بمزاجهم هيمشوا غصب عنهم .
تخيلوا فى الوقت اللى السعوديين فيه بيحاولوا يخرجوا من عبائة الوهابية المتخلفة ...احد اسباب جهل الوطن العربى كله ....نلاقى المصريين اللى هما كان مهد التحضر رايحين وبيدَوروا على الوهابية .....
زى مانتوا واخدين بالكوا انا مبكلمشى عن الاقباط .... لان الموضوع بقى اكبر بكتير من مشكلة الاقباط ....المشكلة بقت مشكلة وطن ...المشكلة بقت المصريين المستنيرين ..... اللى على مصيبة رايحين .....وهما مش داريانين .
انا عارف ان كلنا حاسين ان مش هو ده االلى احنا كنا عاوزينه .... وعارف ان احنا خايفين من بكره وخايفين من الهجمة المرتده اللى بيقوم بيها السلفيين والاخوان المسلمين ....
كل واحد بيشتغل فى مكان شايف ان الدنيا زى ما هى ومافيش حاجة اتغيرت ...ويمكن اللى اتغير اتغير للاسوأ ......
لازم الكل فى ايد واحده يحاول يعمل عملية تنوير للناس ....لسه فى امل 3 شهور ...لازم يبقى فى حملة توعية من المسلمين المعتدلين المتعلمين اللى نزلوا يوم 25 ويفهموا الناس ....يفهموا الناس اللى احنا عاوزينه وبنحلم بيه ....نحاول نفهمهم ان ربنا موجود فى كل مكان ...حتى فى اسوا الاماكن ....لازم نفهمهم ان ربنا هيحمينا سواء دخلنا برجلينا اليمين ولا الشمال ....او حتى لو رجلينا مقطوعة ....
لازم نفهمهم ان الانسان الاعسر –الاشول – مش خلقة الشيطان وانه لو بيعمل عمل كويس وبيصللى لربنا هيدخل الجنه .
لازم نخليهم يفكروا فى ربنا من منظور الرحمة ...مش منظرور قطع الايد والرقبة ....لازم نخليهم يحبوه مايخفوش منه ...
لو معملناش كده فى 3 شهور ....لازم تعرفوا هتخلعوا تروحوا على فين؟؟؟؟؟